RSS

Tag Archives: வலி

“காதல் கடிதம்”

"காதல் கடிதம்"

உன் மேல் உதட்டிற்கு கீழாக 
தேன் கன்னத்திற்கு ஓரமாக
எனது கண்விழி போல மச்சம்
அதுவே என் காதலின் உச்சம்.
உன் பதிலை நோக்கி…
 
என் கண்ணில் உன்னை கண்ட நொடி,
என்னுள் உன் மீது காதல் கொண்டேன்.
காதலைக் கண்டவன் கவிஞன் ஆவான்.
நானோ, கயவன் அல்லவா ஆனேன்-
உன் இதயத்தை திருடி.
உன் பதிலை நோக்கி…
 
ஏனடி என் கண்ணில் நீ விழுந்தாய்
என் இதயம்  அல்லவா வலிக்குதடி !!
என் நெஞ்சம் என்ன உனது இல்லமா?
அழகாய் அமர்ந்து வெளியே வர மறுக்கிறாய்.
ஏன்? என்னை இதமாய் இம்சிக்கவா?
உன் பதிலை நோக்கி…
 
ஒவ்வொரு ஆணுக்குள்ளும் “காதல்” எனும் தீப்பொறி இருக்கும்
அதனை பெண்மை எனும் தென்றல் தீண்டும் பொது
எரிமலையாய் வெடிக்கும்.
ஆம், உன்மீது பட்டு வரும் காற்று கூட
எனக்கு தென்றலாய் தோன்றுகிறது.
உன் பதிலை நோக்கி…
 
என் உதிரத்தை உறிஞ்சியவளே,
நீ அமிலமா? அமிர்தமா?
என்னுள் தோன்றவில்லை நீ எதுவென்று?
அமிலமெனில் அன்பாய் கொன்றுவிடு,
அமிர்தமெனில் அழகாய் வாழவிடு… உன்னோடு.
உன் பதிலை நோக்கி…
 
உனைக் காணாத ஒவ்வொரு நாளும்
உயிறற்ற உடலாய் திரிகிறேன்.
உனைக் கண்ட மறுகணமே
கடவுளையும் விஞ்சுகிறேன்.
என்னைக் கடவுளாக்குவதும்,
காட்டில் இடுவதும் உன் பதிலே…
உன் பதிலை நோக்கி…
 
உன் பதிலை என்னிடம் கூறினாலும்
என் இதயம் தான் அதனை நோக்குதடி.
அதனை துடிக்க வைப்பதும்,
தூங்க வைப்பதும் உன் பதிலே…
உன் பதிலை நோக்கி…
 
 
 

குறிச்சொற்கள்: , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , ,

“வலி”

"வலி"

ஆயிரம் முறை
அடித்துக் கேட்டாலும்
அழுத்திச் சொல்வேன்
அம்மா செல்லமென்று.
அப்போதெல்லாம் தெரியாது
அப்பா-வின் வலி.
 

குறிச்சொற்கள்: , , , , , , , , , , , , ,

“மை”

சொல்லுவது உண்மை,
இனமோ பெண்மை,
இறந்தது ஆண்மை,
வண்ணத்தின் ஏழ்மை,
உடையில் வெண்மை,
அழகின் பகைமை,

வயதோ இளமை,
உடலோ வளமை,
பட்டுப்போன செழுமை,
பாவமிந்த பதுமை,
பிரிக்கப்பட்ட பன்மை,
ஒதுக்கப்பட்ட ஒருமை,

சகுனத்தின் உவமை,
வலிகளின் உடமை,
காலத்தின் கொடுமை,
கனவுகளும் கருமை,
காயங்களின் முதுமை,
புறக்கணிப்பதா நேர்மை,

உடைபட்ட உரிமை,
பறிபோன தலைமை,
வாலிபத் தன்மை,
வாட்டும் தனிமை,
வீழ்ந்திட்ட வலிமை,
இறுகிய இனிமை,

மரபுகளின் கயமை,
வாழ்க்கையே வெம்மை,
கொல்லுதடா வெறுமை,
உணர்விலா பொம்மை,
கிடைக்குமா தாய்மை,
மரணமே மகிமை,

விடியாத கிழமை,
அணியாத விழிமை,
இழந்திட்ட வன்மை,
விதவையெனும் அடிமை,
போதுமடா இம்மை,
வேண்டுமா மறுமை?

சமூகமோ பழமை,
இதுவே நிலமை,
எதற்கிந்த பெருமை?
போதுமிந்த பொறுமை,
களைவது கடமை,
அஞ்சுவது மடமை,
மறுமணமே மேன்மை,

எண்ணுவது எளிமை,
களம்வெல்வது கடுமை,
தயக்கங்கள் சிறுமை,
புரிந்திடுவோம் புதுமை,
வெல்லட்டும் வாய்மை,
மலரட்டும் மென்மை.

 

குறிச்சொற்கள்: , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , ,

“நீயடி”

கண்ணியமாய் காதல் செய்தவள் நீயடி,
கொவ்வை இதழ்களால் கொஞ்சியவள் நீயடி,
அன்பிற்கு அகராதி தந்தவள் நீயடி,
காலம்மறந்து கதை பேசியவள் நீயடி,

கவிதைக்கு கரு தந்தவள் நீயடி,
காட்டாறுக்கு கரை போட்டவள் நீயடி,
பிழைகளை சரி செய்தவள் நீயடி,
இலக்கணமாய் இயங்கச் செய்தவள் நீயடி,

இறுகிய மனதை இளக்கியவள் நீயடி,
பாறைக்குள் நுழைந்த தேரையும் நீயடி,
பாய்ச்சலை பக்குவப் படுத்தியவள் நீயடி,
வாலிப-வானுக்குள் வந்த வசீகரநிலா நீயடி,

வில்லேந்திப் பார்வையில் வீழ்த்தியவள் நீயடி,
நித்திரையில் சொப்பனமாய் வாழ்ந்தவள் நீயடி,
கண் மூடினால் கனவாய் நீயடி,
மதி மயக்கிய மங்கையும் நீயடி,

விழிகளுக்கு வலி வழங்கியதும் நீயடி,
துடிக்கும் இதயத்தை தூக்கிலிட்டதும் நீயடி,
கல்லறையை முடிவுரையாய் முடித்ததும் நீயடி,
முடிந்த பின்பு துடிப்பதும் நீயடி.

 

குறிச்சொற்கள்: , , , , , , , , , , , , , , , , , , , , , , , , , , , , , , , , , , , , , , , , , , , , , , , , ,

“மௌனம்”

 

 

 

 

 

 

 

 

வெற்றியின் களிப்பின் போது
மௌனம் என் கடிவாளம்.

மடையிலா மகிழ்ச்சியின் போது
மௌனம் என் அளவுகோல்.

துயரத்தில் துவளும் போது
மௌனம் என் மருந்து.

உரிமையுள்ளோர் உத்தரவிடும் போது
மௌனம் என் சம்மதம்.

தனிமையில் தள்ளாடும் போது
மௌனம் என் ஊன்றுகோல்.

இதயத்தில் சுமைகூடும் போது
மௌனம் என் சுமைதாங்கி.

உள்ளத்தை உறுத்தும் போது
மௌனம் என் வடிகால்.

காதலியின் உரையாடலின் போது
மௌனம் என் மொழி.

உண்மையானோர் பிரியும் போது
மௌனம் என் வலி.

ஏமாற்றம் ஏற்படும் போது
மௌனம் என் சிந்தனை.

எதிரிகள் ஏளனம்செய்யும் போது
மௌனம் என் கேடயம்.

இன்னல்கள் எதிர்கொள்ளும் போது
மௌனம் என் ஆயுதம்.

மண்ணுள் மறையும் போது
மௌனம் என் மரணம்.

ஒரு வார்த்தை சொல்லும்
ஒராயிரம் விளக்கம் மௌனம்.

வலிமைமிக்க மௌனம்.
வன்முறைமிக்க மௌனம்.

 

குறிச்சொற்கள்: , , , , , , , , , , , , , ,

 
%d bloggers like this: